قصه العايله السعوديه مع العايله اليابنيه

السلام عليكم ورحمة الله وبركاته

اتفضلوا هذي القصه الطريفه ان شاء الله تعجبكم



اليـابان 1999
العاصمة / طوكيو
امام إحدى المنازل الخشبيه البسيطة .. والتي تحيطها أشجار الأرز الياباني
خلع السيد " تاكاهاتشي " حذائه أمام باب منزله و وضعه على العتبه .. وأستعد للدخول

" مساء الخير يا زوجتي العزيزة "
" مساء النور زوجي العزيز .. كيف كان يومك ؟ "
" كالمعتاد .. ملئ بالإنجازات والإنتاجات .. ماذا عنك ؟ "
" لا يقل عن إنتاج يومك .. العشاء جاهز سـ ( أنتسبه ) ريثما تأخذ حمامك "
"حسناً .. يلزمني من الوقت 5 دقائق و 20 ثانيه .. وسأتبعك لمساعدتك في ( نتسب ) العشاء "





المملكة العربية السعوديه 1999
العاصمة / الرياض
أمام إحدى الفلل الأنيقة القائمة على الطراز الإنجليزي .. تحيطها أشجار النخيل الأمريكي
توقفت سيارة اللكزس اليابانية لـتأخذ موقعها تحت المظلة الألمانية الصنع .. لتقيها حرارة الشمس
ترجل من سيارته غاضباً .. ليدخل منزله أشعة الشمس الحارقة أعيته عرقاً .. وقرفاً .. العمل كثير وهو الشخص الذي
لطالما اعتاد على الراحه

" وأنتي بس هذي حالتس ! ما أدخل لـ هالبيت إلا وأنتي ماسكتن سماعة هالتبن وتقرقين ! "
" يالله ظهرية خير ! .. ياخي ترا الناس يسلمون أول "
" وأنتي خليتي فيها سلام ! أخاف أسلم وماتردين من كثر مارددتي السلامات اليوم بين فلانه وعلانه .. سكري هالماخوذ وقومي حطي غداي "
تضع يدها على السماعه في حركة أقرب ماتكون روتينيه لتمنع وصول صوت زوجها لصديقتها على الخط ..
" طيب طيب قّصر حسك شوي ! خلاص عشر دقايق وغداك جاهز رح غير وتعال تلقى كلش زاهب "
لقّاها قفاه وذهب لغرفته وهو يتمتم " ليتتس تحرصين علي وعلى البيت كثر حرصتس على صديقاتس ! "

وضعت سماعة الهاتف وصاحت بالخادمه " مريـــم .. حطي الغدا "

:
::
:




أما في طوكيو .. تحديداً منزل السيد والسيدة تاكاهاتشي ..

" كانت وجبة شهية يا عزيزتي .. شكراً لكـ "
" كم أنا سعيدة بسماع هذا منك يا عزيزي .. "
" عزيزتي .. كنت أود أن اخبركِ ببعض التطورات التي حصلت معي في العمل اليوم "
" تفضل .. كلي آذان صاغيه "
" هناك مشروع مُقبل سـ تقوم به شركتنا .. هو خط إنتاج جديد سيتم طرحه في إحدى دول الشرق الأوسط .. وعلى الأرجح هي السعودية .. وكما تعلمين أنا المهندس الإلكتروني المُطور الأول في الشركة .. ويستلزم القيام بهذا المشروع تواجدي حيث سيتم طرحه .. أي يجب علي التواجد في المملكة طوال فترة التجربه "
" أوهـ ولكن يا عزيزي كم سـ يستغرق هذا المشروع ؟ "
" على الأرجح .. 6 شهور "
" ولكن يا عزيزي أنها فترة طويلة جداً وكما تعلم أنا في بداية حملي .. ويصعب علي البقاء دونك "
" وهل تظنين بأنني أصبر دونتس ؟ .. أنتي بتركبين الطياره قبلي يا خلفهم "
السيدة تاكاهاتشي والسعاده تتوسم حروفها " حقاً يا زوجي العزيزي ! قل آمين جعلك لنا ذخر يبو هيتشا "
" آمين .. بس منهو هيتشا ذا ؟ "
" طفلنا القادم ياعزيزي "

:
::
:

في الرياض .. منزل السيد محمد و زوجته أنوار ..

" وش ذا الرز الي مافيه ملح ؟ "
أنوار وقد ضاقت ذرعاً من حلطمة رجلها التي ابتدأت مع دخوله للمنزل و رؤيته لها تقرقر بالتلفون انتهاءاً بالغدا الي ما جاز له " أووف وبعدين يعني يا محمد ؟ وراك مستقعد انت اليوم ؟ "
" الحين لا انتقدت طبختس وقلت عيوبه صرت مستقعد ؟ هذا جزاي ابيتس تحسنين مستوى طبختس "
" طبخ الشغاله مهب طبخي "
" ما شاء الله ! لا والعمه ماتبيني اقول شي لا دخلت ولقيتها متوسده السماعه "
" عاد شف يا ولد الحلال انا ماخذت الإجازه من الدوام الا وانا تعبانه ! وحده بأول حملها تهقى فيها حيل للطبخ والنفخ ؟ "
" لا بالله انا اشهد ان مافيتس حيل الا للقرق والحش ! "

:
::
:

وبعد إنتهاء وجبة الغداء وحيثما كان محمد مستلقي أمام التلفزيون يحتسي أقداحاً من الشاي المنعنع ، وكانت زوجته أنوار بجانبه .. وهو كالعادة سافطها ومهوب معطيها وجه .. وأساساً لام الله من لامه كل حتسيها بـ فلانه وعلانه وأبيك تسوي وأبيك تجيب .. مالكم بالطويلة .. رن جوال محمد

محمد ينظر لشاشة هاتفه ويردد بتذمر وامتعاض واضحين " أوووف يالله ظهرية خير !! توي طالعـ ن من عنده وش يبي هو ووجه "
أنوار بفضول " منهو ؟ "
محمد في محاولة منه لتفريغ شحنة غضبه في أنوار " مهب شغلتس .. وقصري لصوت التلفزيون قصّر الله بعمر العدو "

رد على تلفونه ..

" الو .. هلا وسهلا ابو عبدالله .. حياك ياطويل العمر سم ؟
لا ابد ولا ازعجتني ولا شيء ..
العصر ؟ خلاص انت تامر .. الساعه 4 انا عندك بأذن الله
حياك يبوي .. فمان الله .. "

ومن هالمكالمة فهمت انوار ان رجلها بيطلع لشغله العصر وقالت فرصه اقول له يجدعني عند اهلي من زمان ماشفتهم [ ويـن من زمان يرحم والديتس البارح مارجعتي من عندهم إلا تالي الليل .. أثبتت الدراسات أن المرأة السعودية تنقع في بيت أهلها بعد العرس فتره أطول من فترة نقعتها قبل العرس ]

العصر .. في مكتب " ابو عبدالله " مدير محمد المباشر في العمل

" معليش يا محمد ازعجناك "
" لا شدعوه يبو عبدالله هذا شغلي بس آمر وش بغيت ؟ "
" السالفه من قاصرها هي أنه بيجينا وفد ياباني لمتابعة خط الإنتاج الجديد الي شريناه منهم .. ومثل ماانت عارف الشغله مهيب اسبوع والا شهر .. الشغله شغلة 6 شهور .. يعني زمن .. ومحتاجين لواحد يشرف على هالوفد ويتابع أموره طول فترة استضافتنا له "
" مممم .. طيب كني فهمت قصدك بس هالوفد من كم شخص ؟ "
" مهندس واحد بس "
" "
" قايل نكته انا ؟ "
" لا بس .. مهندس واحد وصاجنا من الصبح وفد وفد الله يطول لي بعمرك "
" المشكله ان المهندس الواحد منهم قدام عشرين واحد منكم .. يسوى وفد ! المهم يا محمد انا رشحتك لـ هالمهمه ومتأكد أنه مافي أحسن منك لها .. ابتداءاً بطلاقتك اللغويه انتهاءاً بدراستك الجامعية الي كانت في اليابان .. يعني بيكون في أمور مشتركه بينكم "
" طيب وش مطلوب مني بالضبط ؟ "
" اول شي مثل ما قلت لك هي 6 شهور مهيب شوي فالرجال بيجي مع اهله <-- بعذرك سعودي فـ نبيك تحسسهم بجو من الألفه والأريحيه انت خابر هالمخترعين ما يبدعون الا اذا ريحوا وحنا نبي ابداعهم "
" يوه ! وشلون يعني انومهم في بيتي ؟ "
" لا .. بس احرص انك انت والمدام تقضون معهم اغلب اليوم .. انت عربي يا محمد وتعرف طبع العرب ماله داعي اوصيك "
" مالك الا الي يرضيك .. والله ان طلعني من بيتي وذبّح أهلي أن ماتشوفني غير فاقـ ن كشرتي واتضوحك له "
" ليـه ؟ وش الطاري ؟ "
" أنت تقول طبع العرب .. "

:
::
:

وبالفعل خلال أسبوع كانت رحلة السيد " تاكاهاتشي " وحرمته من مطار طوكيو إلى مطار الرياض
و وصلت الطيارة معلنةً معها بدء الحفلة

بعد ما استقبل محمد المهندس تاكاهاتشي و زوجته في المطار وركبهم معه في سيارته ، لزّم عليهم ياخذهم لبيته أول .. يتعشون عنده وتتعرف مدام تاكاهاتشي على أنوار زوجة محمد ..
وفي الطريق دار بين تاكاهاتشي ومحمد حوارات عده في أمور كثيرة ماتخيل محمد أنهم راح يتطرقون لها .. بالعكس الوكاد أنه زملـ ن من الركود الي بيصير بينهم وبما انه سعودي فما فوت فرصة التميلح على تاكاهاتشي وحرمته ومن كثر ما حتسى بنفسه شوي ويقولهم تراي الملك بس متنكر
كان تاكاهاتشي مصدوم نوعاً ما من شوارع الرياض .. وبطبيعة الحال ما حاول يخفي صدمته عن محمد وبادره بالتعليق ..

" تصدق يا أستاذ محمد رغم ان المملكه من أكبر الدول المصدرة للبترول في العالم.. إلا أنه عندنا تصور سيء عن طبيعة المعيشه هنا "
" ماجبت جديد بس وراه ؟ "
" يعني .. انت خابر <-- اجل تاكاهاتشي يقول انت خابر !؟ عايشين ع الإستيراد والصناعات المحلية قليله .. و خط إنتاج جديد بينزل عندكم تحتاجون لمهندس من برا يتابعه ! ماتشوف إن هالشيء مؤشر سيء ؟ "
"تلايط بس "
" what dose it mean talayat ? "
محمد غدا وجهه اصفر يوم حجر له تاكاهاتشي بهالسؤال وش يقول له ؟ يقول له يعني خم اثرك ولا يكثر ! والله ان تسان يهج لديرته ويسحب معه خط انتاجهم بكبره قام سريع سريع صرفها وقال له " it's mean i love you "
ثم إستطرد في محاوله منه لتغيير مجرى المحادثه ..
" تصدق يا تاكاهاتشي انا درست المرحلة الجامعيه في اليابان وتحديداً في طوكيو جامعة واسيدا "
" شي جميل .. وش كان تخصصك ؟ "
" هندسة كهربائية "
"رائع .. طيب ليه ما استلمت موضوع خط الإنتاج ؟ ليه طلبتوا مهندس خارجي ؟ "

محمد في خاطره وش اقوله ؟ اقول أن ربعنا مايثقون في عيال البلد ؟ اقوله ان الأجنبي عندنا معصوم من الغلط ورسول منزل ؟ اقول له ان الأجنبي الأمي عندنا موثوق فيه أكثر من السعودي المتعلم ؟
بس محمد بارك الله فيه ماحب يكب عفشنا عند خلق الله وتدارك الموقف وقال
" انا ماسك مشروع في بلجرشي حالياً ومنيب فاضي وبعدين أنت ابوها وسمها .. المنتج لكم ومحد بيعرف له كثركم "

:
::
:

لما وصلوا لبيت محمد ونزلوا كانت أنوار مجهزه العشاء واستقبلتهم احسن استقبال وكانت هالليله هي بداية التعارف بينهم ما اقولكم أنهم اندمجوا مع بعض على طول بس ما يمنع أن كل طرف كان عنده شغف ورغبة في اكتشاف الطرف الآخر ..
الإمبراطورية اليابانيه x صحراء الجزيرة العربية <-- مونديال 605 ق.م

من بكرا بدا محمد و زوجته ينفذون مخططهم الترفيهي والسياحي مع تاكاهاتشي و حرمته .. وكانوا في كل ساعه تعدي بيومهم يفكرون يالله هاليابانين شعب عجيب .. يسألون عن كل شيء ويبون يعرفون آلية عمل أي شيء يصادفهم ! أحرجوا محمد بأسئلة ما توقعها .. حتى وهم يفطرون في أحد هالمطاعم كان جنبهم طاوله فيها قصمان ولما قضوا مفطرين وركبوا السياره التفت تاكاهاتشي على محمد وسأله what dos't mean BOH ؟
وزوجة تاكاهاتشي فتحت مع أنوار نقاشات ما تخيلت إمكانية التطرق لها .. الإستنتاج الوحيد الي طلعوا فيه من إستضافتهم لتاكاهاتشي وزوجتة هو أن الياباني شخص ما يعيش الا في عالم يفهم فيه أتفه التفاصيل قبل أهمها <--- خلف الله علينا الي حتى كتالوجات الآلات والأجهزه محنب نقراها
المهم يومين ثلاث ايام بالكثير وقضى المخطط السياحي .. الله واكبر من كثر المعالم السياحيه عندنا عاد الحين <-- طيب وراتس ششتي يالعبده !


وبدا خط الانتاج يشتغل وهالشي كان يتطلب تواجد محمد والمهندس تاكاهاتشي في الشركه كثير وبطبيعة الحال كانت زوجتة تقضي طول اليوم عند أنوار .. وربي يسر أمر انوار وكانت قادره تنسجم مع زوجة تاكاهاتشي رغم عدم وضوح لغة مدام تاكاهاتشي الانجليزية أغلب الساعات يتمحورها موضوع حملهم وكل الثنتين حوامل للمره الأولى وكمان شهور حملهم متقاربه كثير فكان هالشيء مساعد على انسجامهم بالغصب .. يضيع وقتهم في طرح الأسئلة على بعض بخصوص بروتوكولات بلد كل وحده في حملها وولادتها .. زوجة تاكاهاتشي انصدمت لما درت ان المرأه عندنا تقضي اربعين يوم بكسل ( مهوب بكسل pixel لا بـ كسل <-- اشوا انتس علمتيهم يالماصله ) + أكل دسم واستغربت اكثر من خوف انوار من عدم رجوع وزنها الطبيعي بعد الولاده ! وفي خاطرها وش هالغباء !
اربعين يوم تدقين فيها أنواع الأكل الثقيل وانتي بفراشتس الله يحلل الفقمه عندتس ! <-- هذي افكار مدام تاكاهاتشي ترا انا ماقلت شي
رغم مرور حول الشهر على وجود تاكاهاتشي في الرياض الا ان هالمده ما كانت كفيله بجعل زوجته تحب أو تتقبل القهوه العربيه ولا كان كافي ابداً لجعل انوار تتقبل حواق حرمة تاكاهاتشي مير من اول كانت تجاملها وتخليها تحوس بالمطبخ ويوم شافت الدعوه سمك يربص بمياهه وبيض ني وهالخرابيط قالت لها انتي حامل مهوب زين تدخلين المطبخ واجد
الشيء الوحيد الي كان يجمعهم هو الشاي وتعملت انوار طقوس الشاي الياباني وصارت تسويها كل عصريه لزوجة تاكاهاتشي <-- ماودتس تشوفين لها اسم اقصر من ذا

وفي عصرية من هالعصريات وبينما كانت أنوار ومدام تاكاهاتشي يسولفون في الصاله على بالهم انهم لحالهم مايدرون ان فيه أطراف أخرى تتجاذب أطراف الحديث والمحارش والمغاير

[


" هيه هيه أنت قوم كم صارلك نايم ! قوم زهقت لحالي "
" اووف اصصص اسكت ياخي خلني بنوم شوي وش تبي انت ووجهك ؟ "
"احد ينام العصر ؟ وش هالطبع الخربان فيك ! قوم سولف معي شوي ! تراي مااخترعت المترجم الناطق عبث ، مسويه علشان تسولف معي واسولف معك مو تطنشني طول اليوم وتنام "
" والله عاد أنا كل ماصحيت لقيتك تحوس بأسلاكك وزراديتك .. جعلك تقص حبلك السري وانت ماتدري "
" ذكرتني على طاري الأسلاك .. بارك لي خلصت جهازي الجديد "
" هبو عليه كل خمس دقايق مخترع جهاز انت "
" آآه وش اسوي بس ! حنا شعب ما يعترف بالفرد العقيم "
" كيف يعني ؟ وش تقول انت وش تخربط ؟ مين عقيم هذا ؟ "
" قصدي انو حنا اليابانيين اذا نزلنا من بطون امهاتنا لازم نكون مخترعين ع الأقل خمس اجهزه .. عربون إنضمام للكرة الأرضيه ومفكرين بـ مالا يقل عن 20 اختراع جديد للمستقبل ! عشان كذا تشوفني مشغول طول الوقت ! "
" اقول بس انطم مافهمت عليك .. وهالخبله امي حومت كبدي من الصبح وهي تقحن شاهي وقهوه دوختني ابي حلييييب من زمان ماصبت علي حليب "
" دايم اسمع ماما تنصح امك انها تخفف من المنبهات بس امك ماتسمع النصيحه "
" اسمع عندك ولاعه ؟ "
" وش تبي فيها ؟ "
" بشبها تحت معدتها يمكن تحس بحرقان وتشرب حليب يهجده عليها .. ومنها ارضع انا من زمان مارضعتني "
" مجنون ! تحرق بطن امك "
" اسمع على طاري أمي .. اهلك وش بيسمونك ؟ "
" هيتشا "
" يرحمك الله .. ايوا وش بيسمونك ؟ "
" هيتشا "
" لاحول شكلك زكمت هذا وامك ماتشرب الا دافي "
" وش فيك انت ؟ اقولك اسمي هيتشا "
" آهــا ! احسبك تعاطس والله "
" وانت وش بيسمونك ؟ "
" مدري ! اصلاً كل ليله لهم راي وكل يوم يتهاوشون على الإسم خخخ عادي عربو لا وازيدك من الشعر بيت .. للحين مايدرون وش انا ولد والا بنت "
" يؤيؤيؤ ! كيف بس ؟ امك ماسوت السونار ؟ "
" الا سوته يمكن خمس مرات وكل مره اشوفهم مقربين مني الجهاز اضم رجولي واعطيهم ظهري .. لعانه بس "
"غريب انت ياخي ! ماودك تعرف وش اسمك ؟ "
" اعرفه بس استهبل عليك أو بالأحرى<-- اما عاد جنين ويقول بالأحرى ! قويه يا وعه بالأحرى مستحي منك "
" لا لا تستحي علمني "
" شف وانا اخوك ! انا من حملت فيني امي وانا ما اسمع زوجها الي هو ابوي اذا جا يتكلم فيني الا يقول الدعله او النشبه فـ تخير لك واحدن من هالأثنين ونادني به "
" ليه ابوك كذا ؟ على اني احسه انسان كويس "
" لا هم كذا السعودين يتميلحون على الأجانب ويلعنون خامس عيالهم .. عادي اصلا انا مانيب بحبه واحس اني اذا نزلت من بطن امي بتهاوش معه وبضف شنطتي وبنحاش من البيت "
" عيب عليك هذا ابوك "
" ياااا شيخ ! غثني مضيق علي بكل وقت ! الحين هالتسع شهور مستأجرهم انا بالكامل وعنادن فيه بقعد للعاشر وراه مايحترم هالشي ويتركني براحتي هذا غير نبرة صوته الشينه الي يتكلم فيها لا صار يسولف مع امي عني ما كأني اول عياله "
" المهم بس خل عنك كثر الحنه والرنه مو نافعك هالشي .. من بكرا ابي اشوفك تشتغل وتفكر ، ياخي مامليت من هالرباده الي انت فيها ! مابي ارجع لليابان الا وانا شايف لك إنجاز
ياللا ماما شكلها بتروح تتروش الحين .. باي "

:
::
:

مرت الأيام سريعه على الجميع وتقدمت كلاً من مدام تاكاهاتشي وأنوار في أشهر حملهم .. وطارت الشهور بسرعه وقربت فيها رجعة تاكاهاتشي لليابان بعد ما تأكد من اتخاذ الأمور في الشركه مجراها الطبيعي .. خلال هالفتره كان جنين تاكاهاتشي [ أنت يا هيتشا ] وجنين أنوار [ الي اتفقوا واخيرا كانه ولد بيسمونه بدر على ابو محمد ] مسوين سوا علاقه مميزه .. صح ما كانوا يتفقون وعلى طول يتقابعون بس ولو كانوا مسلين بعض وفي يوم من الأيام الأخيره كانوا طالعين كلهم يتعشون برا كـ توديع لعائلة تاكاهاتشي .. وفي المطعم كانوا يسولفون وعايشين جوهم ..... وتاكاهاتشي كل خمس دقايق يلتفت على زوجته ويمسك يدها ويقولها talayate بزعمه أحبـك .. وهي ترد عليه بـ la ykthar بعدما ما قالت لها أنوار ان معناها أنت عزيز جداً علي

شغل هيتشا جهاز المترجم الفوري يبي ييسولف مع بدر ولقاه متربع ومتركي على كلية أمه وبيده مقص وتحته أوراق صغيره كثيرة ومستمر بالتقصيص

" بدر وش تسوي ؟ "
" اشتغل مو انت قلت لي لازم تترك الكسل وتدور لك شي تسويه ؟ "
" طيب قلت لك اشتغل مهب حوس حشا امك ! الحين وش ينظف هالحوسه ؟ "
" اووف اسكت خلني اكمل .. اصبر عندك قلم ؟ "
" ليه ؟ "
وبهالوقت غيرّ بدر جلسته وانسدح على بطنه ونسف حبله السري على ظهره وقال لهيتشا وهو يعدل سدحته

" بكتب على الورق "
" وش بتكتب ؟ "
" رقمي ياخي الواحد بينزل وأموره خالصه .. ناوي ع الممرضه اول شي ان شاء الله .. بعدين عاد بغرفة الحضانه انواع البنات .. كل مفرش وردي اشوفه بجدع عليه ورقه .. لا ويقولون لك هالموسم موسم بنات .. اغلب المواليد ورديات "
" ما اقول الا الله يخلف على هلي شايلتك لو تدري عن مواريك ان كان رمتك بأقرب دورة مياه "

:
::
:

في المطار كان محمد وتاكاهاتشي يخلصون اجراءات سفر الرجال وحرمة تاكاهاتشي <-- يا ذا الحرمه الي قضت القصه وهي للحين مالها اسم المهم حرمته وانوار جالسين يستنونهم .. أنوار ما تخيلت انها راح تفقد مدام تاكاهاتشي ولا توقعت ان بيضيق صدرها يوم وداعها .. وكانت حاسه بشي مره غريب .. ماتدري ان حتى الي في حشاها بيفقد العبقري الي بطن محاكيتها <-- تراي خشيت جو وصدقت نصبتي طلعت بهالأثناء مدام تاكاهاتشي ورقه مربعه وملونه من شنطتها وقامت تسفطها بإتجاهات مختلفه وبسرعه لما رفعت يدها عنها كانت مسويه بالورقه طير .. مدته لأنوار وقالت لها هذا فن الأوريجامي .. من الفنون العريقه في اليابان .. علقيها في سرير طفلك الجاي .. شكرتها أنوار وخنقتها العبره وفتحت شنطتها تدور مناديل ولقت تولة دهن العود حقتها وعلى طول مدتها لها وقالت ان هذا يعتبر من الزيوت العطريه العريقه والثمينه في المملكه والخليج عامةً وخذيه بالعافيه عليتس

:
::
:

ومشوا في امان الله ورجعت حياة كل واحد منهم على ما كانت عليه في سابق عهدها .. مع بعض التغيير في المعتقدات والأفكار عند كل واحد منهم عن الثاني .. هذا لا قالولكم فوائد العولمه


وبعد 20 سنه

هيتشا تاكاهاتشي



مخترع ياباني مشهور لعمالقة الروبوتات في العالم

بدر محمد



اشهر مفحط في الرياض

مايستفاد / اليابان تهزها الزلازل وهي تهز العالم !